အမေရိကန်နိုင်ငံတွင် ချစ်ပ်ထုတ်လုပ်ရေးစက်ရုံ၃ခုအပါအဝင် ဒေါ်လာ ၁၀၀ ဘီလီယံရင်းနှီးမြှုပ်နှံမည်ဟု TSMC နှင့် သမ္မတထရမ့်တို့ ကြေညာ

Image via Tom's Hardware

မနေ့က အိမ်ဖြူတော်မှာ ကျင်းပခဲ့တဲ့ သတင်းထုတ်ပြန်ပွဲမှာ TSMC ရဲ့ CEO ဖြစ်သူ C.C. Wei ဟာ သမ္မတ Donald Trump ရဲ့ဘေးမှာရပ်ပြီး TSMC အနေနဲ့ အမေရိကန်မှာ ဒေါ်လာ ၁၀၀ ဘီလီယံ ရင်းနှီးမြှုပ်နှံမှာဖြစ်ကြောင်း ကြေညာခဲ့ပါတယ်။ ဒီရင်းနှီးမြှုပ်နှံမှုအများစုဟာ အရီဇိုးနားပြည်နယ်မှာ ဖြစ်ပေါ်လာမှာပါ။

"ကမ္ဘာ့အကောင်းဆုံး AI chip များကို ဟောဒီ အမေရိကန်ပြည်ထောင်စုမှာ ထုတ်လုပ်သွားမယ်" လို့ သမ္မတထရမ့်က ပြောကြားခဲ့ပါတယ်။ TSMC ဟာ အမေရိကန်က ချစ်ပ်ထုတ်လုပ်ရေးစက်ရုံတွေမှာ ဒေါ်လာ ၆၅ ဘီလီယံ ရင်းနှီးမြှုပ်နှံထားပြီးထားတယ်ဆိုပေမယ့် နောက်ထပ် ဒေါ်လာ ၁၀၀ ဘီလီယံရင်းနှီးမြှုပ်နှံသွားမှာဖြစ်ပါတယ်။

သမ္မတထရမ့်က အဆိုပါရင်းနှီးမြှုပ်နှံမှုတွေက ချစ်ပ်ထုတ်လုပ်ရေးစက်ရုံ ၃ခု၊ packaging facilities ၂ခု၊ သုတေသနနဲ့ ဖွံ့ဖြိုးတိုးတက်မှုစင်တာ ၁ ခု တည်ဆောက်ဖို့အတွက် ရည်ရွယ်ကြောင်း ပြောကြားခဲ့ပါတယ်။ Arizona စက်ရုံမှာတစ်ခုတည်းမှာ အလုပ်အကိုင် ၂သောင်းကျော် ဖန်တီးနိုင်မယ်လို့ သမ္မတထရမ့်က ပြောကြားခဲ့ပေမယ့် TSMC ရဲ့ သတင်းထုတ်ပြန်ချက်မှာတော့ “လာမည့်လေးနှစ်အတွင်း ဆောက်လုပ်ရေးဆိုင်ရာအလုပ်အကိုင် ၄သောင်း ရရှိနိုင်မှာဖြစ်ပြီး အဆင့်မြင့် semiconductor ထုတ်လုပ်ရေးနဲ့ သုတေသနနဲ့ ဖွံ့ဖြိုးတိုးတက်မှုဆိုင်ရာ အဆင့်မြင့် နည်းပညာအလုပ်အကိုင်တွေ သောင်းချီ ဖန်တီးနိုင်မယ်” လို့ ဖော်ပြထားပါတယ်။

TSMC က ဘယ်လို node တွေ ထုတ်လုပ်မယ်လို့ မပြောထားသလို ထုတ်လုပ်နိုင်မှုစွမ်းရည်အကြောင်းကိုလည်း မဖော်ပြခဲ့ပါဘူး။ Apple၊ AMD၊ Nvidia နဲ့ Qualcomm တို့ကတော့ အလားအလာရှိတဲ့ ဖောက်သည်တွေဖြစ်လာနိုင်ကြောင်းကိုသာ ဖော်ပြခဲ့ပါတယ်။

သမ္မတထရမ့်ကတော့ အမေရိကန်တွင် အဆင့်မြင့် ဆီမီးကွန်ဒတ်တာတွေ ထုတ်လုပ်ရေးဟာ စီးပွားရေးနှင့် အမျိုးသားလုံခြုံရေးအတွက် မဖြစ်မနေလိုအပ်ကြောင်း အလေးထားပြောကြားခဲ့ပါတယ်။

သမ္မတဘိုင်ဒင်အစိုးရလက်ထက်မှာ CHIPS and Science Act က TSMC ကို အမေရိကန်ကို ပြောင်းရွှေ့ဖို့ တွန်းအားဖြစ်စေခဲ့တယ်လို့ ယူဆနိုင်ပေမဲ့ ကုန်သွယ်ရေးဝန်ကြီး Howard Lutnick က TSMC ကို အမေရိကန်ကို ပြောင်းရွှေ့စေတာဟာ သမ္မတထရမ့်ရဲ့ အခွန်ကောက်ခံမှုတွေကြောင့်လို့ ဆိုပါတယ်။

ဒီပြောင်းရွှေ့မှုက TSMC ကို ထိုင်ဝမ်ကနေ ထုတ်လုပ်မှုကို အခြားနေရာတွေကို ဖြန့်ကျက်နိုင်စေမှာဖြစ်ပါတယ်။ အထူးသဖြင့် ထိုင်ဝမ်ကျွန်းဟာ ငလျင်နဲ့ တိုင်ဖွန်းမုန်တိုင်းလို သဘာဝဘေးအန္တရာယ်တွေနဲ့ မကြာခဏ ရင်ဆိုင်နေရပါတယ်။ ဒါ့အပြင် တရုတ်နဲ့ နိုင်ငံရေး အရတင်းမာမှုတွေလည်း ရှိပါတယ်။ အမေရိကန်က စက်ရုံတွေက TSMC ကို သူတို့ရဲ့ ဖောက်သည်တွေနဲ့ ပိုမိုနီးကပ်စေမှာဖြစ်ပြီး ဒီစက်ရုံအသစ်တွေက ပေးအပ်မယ့် ထုတ်ကုန်တွေကို အထက်မှာ CEO Wei ပြောခဲ့တဲ့ ကုမ္ပဏီတွေနဲ့ စာချုပ်ချုပ်ပြီးသားတောင် ဖြစ်နိုင်ပါသေးတယ်။

ဒီသတင်းကို လူတိုင်းက အပြုသဘောအဖြစ်မြင်ကြမှာ မဟုတ်ပါဘူး။ Intel ဆိုရင် ၂၀၂၄ ခုနှစ် ဒုတိယနှစ်ဝက်မှာ ငွေကြေးအခက်အခဲတွေနဲ့ ရင်ဆိုင်နေရသလို သူ့ရဲ့ ပြိုင်ဘက်ကြီးတစ်ဦးကအမေရိကန်မှာ ချစ်ပ်တွေ ထုတ်လုပ်နေပြီး နောက်ထပ် ရင်းနှီးမြှုပ်နှံမှုတွေ လုပ်မယ်လို့ ကတိပေးထားပါပြီ။ TSMC က သူ့ရဲ့ အဆင့်မြင့်ဆုံး ချစ်ပ်တွေကို ထုတ်လုပ်မလားဆိုတာကို မသိနိုင်သေးပေမဲ့ ထိုင်ဝမ်အစိုးရက 2nm ချစ်ပ်တွေကို ပြည်ပမှာ ထုတ်လုပ်ဖို့ ကုမ္ပဏီကို ခွင့်ပြုခဲ့ပြီးဖြစ်သလို အရီဇိုးနားစက်ရုံမှာထုတ်လုပ်ဖြစ်မယ့် အလားလာများပါတယ်။

Source: Tom's Hardware