Encoding နှင့် Ray Tracing ကို အဓိကအဆင့်မြှင့်တင်မှု ပြုလုပ်ထားသည့် AMD ၏ RDNA 4 GPU များ

AMD ရဲ့ GPU encoder တွေဟာ game streaming အတွက် လူကြိုက်များတဲ့ format တွေနဲ့ bitrate တွေကို အသုံးပြုတဲ့အခါ ညံ့ဖျင်းတဲ့ video encoding အရည်အသွေးအတွက် အချိန်အတော်ကြာ ဝေဖန်ခံခဲ့ရပါတယ်။ ဒါကြောင့် video encoding ကို အသုံးပြုချင်သူတွေဟာ Nvidia ကိုသာ ရွေးချယ်ခဲ့ကြပါတယ်။

အခုဆိုရင် AMD က RDNA 4 မှာ video encoding အရည်အသွေး သိသိသာသာ တိုးတက်လာတယ်လို့ ဆိုလာပါတယ်။ သူတို့ ပြသခဲ့တဲ့ ဥပမာတွေကလည်း အများရဲ့အာရုံစူးစိုက်မှုကို ဖမ်းစားနိုင်ခဲ့ပါတယ်။ AMD က အသုံးအများဆုံး ဆက်တင်တွေထဲက တစ်ခုဖြစ်တဲ့ 1080p H.264 နဲ့ HEVC ကို 6 megabits per second မှာ အထူးအသားပေးပြသခဲ့ရာမှာ ရုပ်ထွက် အရည်အသွေး သိသိသာသာ တိုးတက်လာတယ်လို့ဆိုပါတယ်။

ဒါက အခြေအနေအမျိုးမျိုးမှာ မှန်ကန်နေဦးမလားဆိုတာကို စောင့်ကြည့်ရဦးမှာပါ။ ယခင်ကဆို AMD ရဲ့ video encoding အရည်အသွေးအကြောင်းဆွေးနွေးမှုတွေမှာ AV1 လိုမျိုး ဖော်မတ်အသစ်တွေကို အထောက်အပံ့ပေးခြင်းကိုသာ အဓိကထားခဲ့ပါတယ်။ RDNA 4 နဲ့အတူ AMD က လက်တွေ့မှာ တိုးတက်မှုတွေကို အာရုံစိုက်လာပါတယ်။ ဒါက သူတို့ရဲ့ video encoder ရဲ့ အရည်အသွေးကို ပိုပြီး ယုံကြည်မှုရှိကြောင်း ဖော်ပြနေပါတယ်။

AMD က H.264 low-latency encode quality မှာ တိုးတက်မှု ၂၅%၊ HEVC မှာ တိုးတက်မှု ၁၁%၊ B-frame အထောက်အပံ့နဲ့အတူ ပိုကောင်းတဲ့ AV1 encoding နဲ့ 720p မှာ encoding စွမ်းဆောင်ရည် ၃၀% တိုးတက်မှုရှိကြောင်းဆိုပါတယ်။ 

Encoding အပြင် တခြားထင်ရှားတဲ့ တိုးတက်မှုတွေလည်း အများကြီးရှိပါတယ်။ ray tracing core မှာ အရင်က တစ်ခုအစား အခုတော့ intersection engines နှစ်ခု ပါဝင်လာပြီး ray-box နဲ့ ray-triangle intersection တွေအတွက် throughput နှစ်ဆ တိုးလာပါတယ်။ ray tracing ရဲ့ အစိတ်အပိုင်းတချို့ကို shaders တွေကနေ RT core ဆီ လွှဲပြောင်းပေးတဲ့ ray transform block အသစ်တစ်ခုကိုလည်း မိတ်ဆက်ထားပါတယ်။

BVH (Bounding Volume Hierarchy) က အခု နှစ်ဆ ပိုကျယ်လာပြီး ray tracing အကောင်အထည်ဖော်မှုမှာ တခြား တိုးတက်မှုတွေ အများကြီး လုပ်ထားပါတယ်။ ဒါကြောင့် RDNA 4 ရဲ့ ray tracing တိုးတက်မှုတွေက rasterization တိုးတက်မှုတွေကို ကျော်လွန်သွားစေတဲ့ အကြောင်းရင်းတစ်ခုလို့ဆိုနိုင်ပါတယ်။

Compute၊ Memory နဲ့ Display အဆင့်မြှင့်တင်မှုများ

compute engine မှာလည်း PCIe 5.0 x16 interface နဲ့ GDDR6 ကို အသုံးပြုထားတဲ့ 256-bit memory bus တို့နဲ့အတူ optimization အများအပြား ပါဝင်ပါတယ်။ AMD က ပိုကောင်းအောင်ဖန်တီးထားတဲ့ memory compression ပါဝင်တယ်လို့ ဆိုထားပြီး GPU တွေမှာ VRAM 16GB တပ်ဆင်ထားတာကြောင့် ခေတ်ပေါ်ဂိမ်းအများစုအတွက် လုံလောက်တဲ့ ပမာဏလို့ဆိုနိုင်ပါတယ်။

သို့သော်လည်း display engine ကတော့ အားသာချက်နဲ့ အားနည်းချက်တွေ ရောထွေးနေပါတယ်။ DisplayPort 2.1 ကို အထောက်အပံ့ပေးထားတယ်ဆိုပေမဲ့ ၎င်းရဲ့ စွမ်းဆောင်ရည်တွေက RDNA 3 ကနေ တိုးတက်မှုမရှိသေးပဲ အမြင့်ဆုံး bandwidth က UHBR 13.5 သာရရှိမှာဖြစ်ပြီး Nvidia ရဲ့ Blackwell architecture မှာဆိုရင် 4K 240Hz display အချို့မှာ အသုံးပြုနေတဲ့ UHBR 20 ကိုပါအထောက်အပံ့ပေးနေပြီပါတယ်။

HDMI 2.1b လည်း ပါဝင်ပါတယ်။ အပြုသဘောဆောင်တဲ့ အချက်အနေနဲ့ AMD က multi-monitor အသုံးပြုခြင်းအတွက် idle ပါဝါသုံးစွဲမှု လျော့နည်းကြောင်း ပြောထားပြီး ဗီဒီယို ဖရိမ် စီစဉ်ခြင်းကိုလည်း GPU ဆီ လွှဲပြောင်းပေးနိုင်ပြီလို့ဆိုပါတယ်။

Navi 48 die ရဲ့ ဧရိယာက  357mm² ဖြစ်ပြီး TSMC 4nm နဲ့ တည်ဆောက်ထားပြီး ထရန်စစ္စတာပေါင်း 53.9 ဘီလီယံ ပါဝင်ပါတယ်။ ဒါက RTX 5080 နဲ့ 5070 Ti မှာ အသုံးပြုထားတဲ့ Nvidia ရဲ့ Blackwell GB203 ထက် အရွယ်အစား ၅% ပိုမိုသေးငယ်တယ်လို့ဆိုနိုင်ပါတယ်။ ဒါပေမဲ့ ထရန်စစ္စတာတွေ ၁၈% ပိုမိုပါဝင်တာကြောင့် ပိုပြီး သိပ်သည်းတဲ့ ဒီဇိုင်းဖြစ်ပါတယ်။

သို့သော်လည်း Nvidia က die ဧရိယာနဲ့ ထရန်စစ္စတာရဲ့ ထိရောက်မှုတွေမှာ အားသာချက် ရှိနေပါသေးတယ်။ AMD ရဲ့ ထုတ်ပြန်ချက်တွေအရ RTX 5080 က RX 9070 XT ထက် rasterization မှာ ၁၅% ခန့် ပိုမြန်ပြီး  ray tracing မှာ ၅၀% ကျော် ပိုမြန်မယ်လို့ မျှော်လင့်ရပါတယ်။ Nvidia က ဒါတွေအားလုံးကို ပိုနည်းပါးတဲ့ ထရန်စစ္စတာအရေအတွက်နဲ့ သေးငယ်တဲ့ die ကို အသုံးပြုပြီးဖန်တီးထားတာပါ။ ဒါပေမဲ့ RTX 5080 ရဲ့ TDP ကတော့ 360W ဖြစ်ပြီး 9070 XT က 304W ဖြစ်ပါတယ်။ ဒါက ပါဝါသုံးစွဲမှု၁၈% ပိုများပြီး ဂိမ်းတွေမှာ တကယ့် ပါဝါသုံးစွဲမှုတွေ ကွဲပြားနိုင်ပါသေးတယ်။ 9070 XT က 300W TDP ပါတဲ့ RTX 5070 Ti နဲ့ ပိုနီးစပ်ပါတယ်။

နောက်ထပ် အသေးစိတ်အချက် နှစ်ခုအနေနဲ့ AMD က RX 9070 XT (သို့မဟုတ်) RX 9070 အတွက် reference model တွေကို ထုတ်လုပ်မှာ မဟုတ်တာကြောင့် ဒီဇိုင်းအားလုံးဟာ ဘုတ်ပါတနာတွေဆီကသာ လာမှာဖြစ်ပါတယ်။ ဒီဘုတ်ပါတနာတွေထဲမှာ ASUS၊ Gigabyte၊ PowerColor၊ Sapphire၊ XFX နဲ့ တခြား ရင်းနှီးကျွမ်းဝင်တဲ့ နာမည်တွေ ပါဝင်ပါတယ်။

ဒီကတ်တွေကို ဇန်နဝါရီလ အစောပိုင်းကတည်းက ရောင်းချဖို့အဆင်သင့်ဖြစ်နေကြောင်းသတင်းထွက်နေတာကြောင့် မတ်လ ၆ ရက်နေ့မှာ ဝယ်ယူနိုင်မယ်လို့ မျှော်လင့်ရပါတယ်။

ဒါ့အပြင် AMD က ၎င်းရဲ့ driver အခြေခံ frame generation နည်းပညာ AFMF 2.1 ရဲ့ ဗားရှင်းအသစ်ကို ထုတ်ပြန်လိုက်ပါတယ်။ ဒါက Radeon RX 6000 စီးရီးနဲ့ အထက် GPUs တွေမှာ အသုံးပြုနိုင်မှာပါ။ AFMF 2.1မှာ ပိုမိုကောင်းမွန်တဲ့ ရုပ်ပုံအရည်အသွေးရရှိမှာဖြစ်သလို ဘယ်ဂိမ်း၊ ဗီဒီယို ဒါမှမဟုတ် အက်ပ်လီကေးရှင်းကိုမဆို အသုံးပြုနိုင်တဲ့ ဒရိုင်ဘာအဆင့် Radeon Image Sharpening ကိုလည်း ထည့်သွင်းထားပါတယ်။ AMD က ဒီ features အတွက်လည်း အရည်အသွေး ပိုကောင်းလာတယ်လို့ ဆိုထားပါတယ်။ အထူးတလည် မထူးခြားတဲ့ AI features အချို့လည်း ပါဝင်ပါတယ်။

Source: TechSpot