Lenovo က နေရောင်ခြည်ဖြင့် အားသွင်းနိုင်သည့် 'Yoga Solar PC' Concept Laptop အသစ်ကို မိတ်ဆက်

Image: Lenovo

Mobile World Congress မှာ Lenovo က ပါဝါကြိုးတွေ အားကိုးနေရမှုကို လျှော့ချပေးမယ့် ထူးခြားတဲ့ လက်ပ်တော့ အသစ်တစ်ခုကို မိတ်ဆက်ခဲ့ပါတယ်။ "Yoga Solar PC" လို့ နာမည်ပေးထားတဲ့ ဒီလက်ပ်တော့မှာ အဖုံးမှာ ဆိုလာပြားတစ်ခုကို ပေါင်းစပ်ထားပြီး ဘယ်လိုအလင်းရောင်မျိုးကိုမဆို အသုံးချပြီး ဘက်ထရီသက်တမ်းကို တိုးမြှင့်ပေးနိုင်ပါတယ်။ ဒါပေမဲ့ နေသာတဲ့နေ့တွေမှာတော့ အားအများဆုံးရမှာပါ။

Image: Future

Lenovo က Yoga Solar PC ကို စတင်ထုတ်လုပ်မယ့် အစီအစဉ်ကိုတော့ တရားဝင် မကြေညာသေးပါဘူး။ သို့ပေမဲ့ ၂၀၂၃ ခုနှစ် Mobile World Congress မှာ Concept အနေနဲ့ ပထမဆုံး မိတ်ဆက်ခဲ့တဲ့ လိပ်နိုင်ဖြန့်နိုင်တဲ့ OLED မျက်နှာပြင်ပါဝင်တဲ့ ThinkBook Plus Gen 6 ကိုတော့ ၂၀၂၅ ခုနှစ် ဇွန်လမှာ ဒေါ်လာ ၃၄၉၉ နဲ့ ဝယ်ယူနိုင်တော့မှာပါ။

Image: Future

Yoga Solar PC ရဲ့ အလင်းစုပ်ယူနိုင်တဲ့ ဆိုလာပြားကို Back Contact ဆဲလ်ဒီဇိုင်းပါရှိတဲ့ နေရောင်ခြည်ဆဲလ် ၈၄ ခုနဲ့ ပြုလုပ်ထားပြီး energy conversion rate က ၂၄ ရာခိုင်နှုန်းရှိတာကြောင့် သာမန် ဆီလီကွန် အခြေခံ ဆိုလာပြားတွေထက် ပိုမိုကောင်းမွန်ပါတယ်။ ဒါပေမဲ့ အလင်းစုပ်ယူမှုနဲ့ ထိရောက်မှုတွေကို ၄၃ ရာခိုင်နှုန်းအထိ မြှင့်တင်နိုင်တဲ့ perovskite ဖလင်ပါဝင်တဲ့ ဆိုလာပြားတွေလောက်တော့ မကောင်းသေးပါဘူး။ Lenovo က ထိရောက်မှု ၂၄ ရာခိုင်နှုန်းရှိတဲ့ Yoga Solar PC ရဲ့ ဆိုလာပြားဟာ "နေရောင်အောက်မှာ မိနစ် ၂၀ ထားလိုက်ရင် ဗီဒီယိုတစ်နာရီစာ ကြည့်ရှုနိုင်တဲ့ လုံလောက်တဲ့စွမ်းအင်ကိုပေးနိုင်ပါတယ်" လို့ ဆိုပါတယ်။ အလင်းအားနည်းတဲ့ အခြေအနေတွေမှာ ပါဝါဘယ်လောက် ထုတ်လုပ်နိုင်မလဲဆိုတာကိုတော့ ဆက်လက်စမ်းသပ်နေဆဲလို့ ဆိုပါတယ်။

Intel Lunar Lake နဲ့ တွဲဖက်ထားတဲ့ Yoga Solar PC မှာ 32GB RAM နဲ့ 1TB သိုလှောင်မှုပါဝင်ပြီး 14 လက်မ OLED မျက်နှာပြင်တပ်ဆင်ထားကာ အထူ ၁၅ မီလီမီတာနဲ့ အလေးချိန် ၂.၂၉ ပေါင်ခန့် ရှိပါတယ်။ အသုံးပြုသူတွေအနေနဲ့ အိမ်တွင်းဖြစ်စေ အပြင်မှာဖြစ်စေ သူတို့အတွက် ရရှိနိုင်တဲ့ အလင်းကို အကောင်းဆုံး အသုံးချနိုင်စေဖို့အတွက် လက်ပ်တော့မှာ နေရောင်ခြည်ပြားက လက်ရှိနဲ့ ဗို့အား ဘယ်လောက် ထုတ်လုပ်လဲဆိုတာကို ပြသတဲ့ Lenovo ရဲ့ Dynamic Solar Tracking စနစ် ဆော့ဖ်ဝဲလ်လည်း ပါဝင်မှာဖြစ်ပါတယ်။

Image: Lenovo

မြက်ခင်းပြင်မှာ အေးအေးဆေးဆေး အလုပ်လုပ်ရင်း ဘက်ထရီကုန်မှာကို စိုးရိမ်နေရတဲ့ သုံးစွဲသူတွေအတွက် Lenovo က ပြင်ပ နေရောင်ခြည်စွမ်းအင်သုံး external solar power kit concept ကိုလည်း ထုတ်ဖော်ပြသခဲ့ပါတယ်။ စာအုပ်တစ်အုပ်လို ဖွင့်လိုက်ရင် ဆိုလာပြား နှစ်ခုကိုဘေးချင်းကပ်ထားတာဖြစ်ပြီး ကျောပိုးအိတ်မှာ တပ်ဆင်နိုင်သလို ခေါက်သိမ်းလို့ရတဲ့ kickstand တစ်ခုလည်းပါဝင်ပါတယ်။ USB-C ကြိုးနဲ့ ကိရိယာတစ်ခုကို ချိတ်ဆက်ပြီး ပါဝါပေးနိုင်သလို နေရောင်ခြည်ကို အသုံးပြုပြီး နောက်ပိုင်းမှာ တခြားကိရိယာတွေကို ပါဝါပေးနိုင်တဲ့ power bank တစ်ခုကိုလည်း အားသွင်းထားနိုင်ပါတယ်။ ဒါကိုတော့ ထုတ်လုပ်သွားမယ့် အစီအစဉ်ကို Lenovo က မကြေညာသေးပါဘူး။

Image: Future

Lenovo က ဒီ concept ကို ဖန်တီးခဲ့ခြင်းဟာ "လုပ်ဆောင်နိုင်စွမ်းနဲ့ သဘာဝပတ်ဝန်းကျင်ဆိုင်ရာ အသိအမြင်အကြားက ကွာဟချက်ကို ပေါင်းကူးဖို့" လို့ ဆိုထားပါတယ်။ ဒါက သုံးစွဲသူတွေကို အခြားစွမ်းအင်အရင်းအမြစ်ကို အလွယ်တကူ ရရှိစေပါတယ်။ Yoga Solar PC ရဲ့ သေးငယ်တဲ့ ဆိုလာပြားကို အသုံးပြုပြီး အားအပြည့်သွင်းဖို့အတွက်တော့ ရာသီဥတုအခြေအနေကို ကြည့်ရှုဖို့ လိုအပ်မှာဖြစ်ပေမဲ့ ပါဝါပလပ်မရှိတဲ့နေရာတွေမှာတော့ အသုံးဝင်တဲ့ ပစ္စည်းတစ်ခု ဖြစ်နိုင်ပါတယ်။

Source: TechRadar and The Verge