နှစ်ပေါင်း ၂၀ ကျော်ကြာပြီးနောက် Microsoft က Skype ကို ရပ်နားတော့မည်

လိုင်းဖုန်းလုပ်ငန်းကို အနှောင့်အယှက်ပေးခဲ့တဲ့ အင်တာနက်ခေါ်ဆိုမှုဝန်ဆောင်မှုကို မေလမှာ ပိတ်သိမ်းမှာဖြစ်ပြီး နည်းပညာကုမ္ပဏီကြီးက Teams ကို အာရုံစိုက်သွားမယ်လို့ ဆိုပါတယ်။

 Photograph: Sheldon Cooper/Sopa Images/LightRocket via Getty Images

Skype ဟာ မေလ ၅ ရက်နေ့မှာ နောက်ဆုံးခေါ်ဆိုမှုပြုမှာဖြစ်ပြီး ပိုင်ရှင်ဖြစ်တဲ့ Microsoft ဟာ နှစ်ပေါင်း ၂၀ လောက် နိုင်ငံရပ်ခြားဖုန်းဆက်သွယ်မှုကို ပြောင်းလဲပေးခဲ့တဲ့ အင်တာနက်ခေါ်ဆိုမှုဝန်ဆောင်မှုကို ရပ်နားတော့မှာပါ။

Skype ကို ပိတ်သိမ်းခြင်းက Microsoft အတွက် ၎င်းရဲ့ ကိုယ်ပိုင် Teams ဝန်ဆောင်မှုကို အာရုံစိုက်နိုင်စေပြီး ၎င်းရဲ့ ဆက်သွယ်ရေးဝန်ဆောင်မှုတွေကို ရိုးရှင်းအောင် လုပ်ဆောင်နိုင်မှာဖြစ်ကြောင်း  သောကြာနေ့မှာ ပြောကြားခဲ့ပါတယ်။

၂၀၀၃ ခုနှစ်မှာ တည်ထောင်ခဲ့တဲ့ Skype ဟာ ၂၀၀၀ ခုနှစ်အစောပိုင်းမှာ အသံနဲ့ ဗီဒီယိုခေါ်ဆိုမှုတွေနဲ့ လိုင်းဖုန်းလုပ်ငန်းကို အလျင်အမြန်အနှောင့်အယှက်ပေးခဲ့ပြီး သုံးစွဲသူ သန်းရာနဲ့ချီရှိတဲ့ အသုံးပြုသူတွေနဲ့ ကုမ္ပဏီကို အထွတ်အထိပ်ရောက်စေခဲ့ပါတယ်။ ဒါပေမဲ့ မကြာသေးမီနှစ်တွေမှာ Skype ဟာအသုံးပြုရလွယ်ကူပြီး ပိုမိုယုံကြည်စိတ်ချရတဲ့ Zoom နဲ့ Salesforce ရဲ့ Slack လို ပြိုင်ဘက်တွေနဲ့ခက်ခဲယှဥ်ပြိုင်ခဲ့ရပါတယ်။ တစ်စိတ်တစ်ပိုင်းအားဖြင့် Skype ရဲ့ အခြေခံနည်းပညာဟာ စမတ်ဖုန်းခေတ်အတွက် သင့်လျော်မှု လျော့နည်းလာတာကြောင့်ဖြစ်ပါတယ်။

ကပ်ရောဂါနဲ့ နေအိမ်က အလုပ်လုပ်ခြင်းတို့က အွန်လိုင်းမှာ လုပ်ငန်းခေါ်ဆိုမှုတွေ လိုအပ်လာတဲ့အခါ Microsoft က Teams ကို အခြား Office အက်ပ်တွေနဲ့ စွမ်းအားပြည့်ပေါင်းစပ်ပြီး တစ်ချိန်က Skype အတွက် အဓိကအားကိုးခဲ့ရတဲ့ စီးပွားရေးလုပ်ငန်းတွေကို ဆွဲဆောင်ဖို့ ကြိုးစားလာခဲ့ပါတယ်။

အွန်လိုင်းဗီဒီယိုဆက်သွယ်မှုဆိုတာ FaceTime၊ Zoom နဲ့ Google Hangouts တို့က နေရာယူမလာခင် တစ်ချိန်က Skype ရဲ့ သီးသန့်နယ်ပယ်တစ်ခုနီးပါး ဖြစ်ခဲ့တာပါ။ Skype ဟာ နည်းပညာထုတ်ကုန်တစ်ခုရဲ့ အစောပိုင်းဥပမာတစ်ခုဖြစ်ပြီး ၎င်းကို ကြိယာအဖြစ် "Skype" လုပ်မယ်လို့ အသုံးပြုရတဲ့အထိ အလွန်အသုံးများခဲ့ပါတယ်။ 

Microsoft က ၂၀၁၁ ခုနှစ်မှာ Google နဲ့ Facebook ကို အနိုင်ယူပြီး Skype ကို ဒေါ်လာ ၈.၅ ဘီလီယံနဲ့ ဝယ်ယူခဲ့ချိန်မှာ ၎င်းရဲ့ တန်းဖိုးအကြီးဆုံး သဘောတူညီချက်တစ်ခုဖြစ်ခဲ့ပြီး ဝန်ဆောင်မှုမှာ လစဉ် သုံးစွဲသူ သန်း ၁၅၀ ခန့်ရှိခဲ့ပါတယ်။ ၂၀၂၀ ခုနှစ် ကပ်ရောဂါကာလအတွင်း ခဏတာ ပြန်လည်ရှင်သန်လာသလိုရှိခဲ့ပေမဲ့ သုံးစွဲသူ ၂၃ သန်းခန့်အထိ ကျဆင်းသွားခဲ့ပြီဖြစ်ပါတယ်။

တချို့အတွက်တော့ Skype က ကုမ္ပဏီကိုယ်တိုင်က နှစ်တွေချီပြီး ဦးစားပေးမှုလျှော့ချခံထားရတာတောင် လည်ပတ်နေဆဲဖြစ်တယ်ဆိုတာ အံ့သြနေကြမှာပါ။ Google အပါအဝင် နည်းပညာကြီးကုမ္ပဏီတွေအတွက်တောင်မှ အောင်မြင်တဲ့ ဆက်သွယ်ရေးကိရိယာတွေ ဖန်တီးဖို့ဆိုတာ စိန်ခေါ်မှုတစ်ရပ်ဖြစ်နေပါတယ်။ အခုဆိုရင် Skype က Duo နဲ့ AOL Instant Messenger တို့လို အနားပေးခံရတဲ့ ဆက်သွယ်ရေးကိရိယာတစ်ခုဖြစ်လာတော့မှာပါ။

Microsoft က Skype ရဲ့ နောက်ဆုံးအသုံးပြုသူအရေအတွက်ကို မျှဝေဖို့ ငြင်းဆိုခဲ့သလို  အလုပ်သမားတွေ လျှော့ချတာမျိုး မရှိဘူးလို့ ပြောကြားခဲ့ပါတယ်။ ၎င်းက Teams မှာ လစဉ်အသုံးပြုသူ ၃၂၀ သန်းလောက်ရှိတယ်လို့လည်း ဖြည့်စွက်ပြောကြားခဲ့ပါတယ်။

Source: The Guardian