Samsung Electronics ၏ ပူးတွဲအမှုဆောင်အရာရှိချုပ် Han Jong-Hee ကွယ်လွန်

Image via Samsung

ကမ္ဘာ့အကြီးဆုံး အီလက်ထရွန်နစ်ကုမ္ပဏီကြီးတစ်ခုဖြစ်တဲ့ Samsung Electronics က သူတို့ရဲ့ ပူးတွဲအမှုဆောင်အရာရှိချုပ်နဲ့ Visual Display Business ဥက္ကဋ္ဌ ဟန်ဂျုံးဟီ (Han Jong-Hee) အသက် ၆၃ နှစ်မှာ ကွယ်လွန်သွားပြီလို့ အတည်ပြုလိုက်ပါတယ်။ ဒီကိစ္စဟာ နည်းပညာလောကတစ်ခုလုံးနဲ့ Samsung ပရိသတ်တွေအတွက် အတော်လေး စိတ်မကောင်းစရာ သတင်းပါပဲ။

ဟန်ဂျုံးဟီဟာ နှလုံးရောဂါကြောင့် ဆေးရုံမှာဆေးကုသမှုခံယူနေရင်း ကွယ်လွန်သွားတာဖြစ်ကြောင်း ကုမ္ပဏီရဲ့တာဝန်ရှိသူတစ်ဦးကဆိုထားပါတယ်။ သူက Samsung မှာ နှစ်ပေါင်းများစွာ အမှုထမ်းခဲ့ပြီး ကုမ္ပဏီရဲ့ ရုပ်မြင်သံကြား (Visual Display) နဲ့ QLED နည်းပညာတွေကို ဦးဆောင်ခဲ့သူပါ။

သူက ၂၀၂၁ ခုနှစ်ကစပြီး Samsung Electronics ရဲ့ ပူးတွဲအမှုဆောင်အရာရှိချုပ်အဖြစ် တာဝန်ယူခဲ့ပါတယ်။ Samsung ရဲ့ အိမ်သုံး အီလက်ထရွန်နစ် (Consumer Electronics) ဌာနကို ဦးဆောင်ပြီး ကမ္ဘာ့ဈေးကွက်မှာ Samsung TV နဲ့ display နည်းပညာတွေကို ထိပ်ဆုံးရောက်အောင် ကြိုးစားခဲ့ပါတယ်။ သူ့ရဲ့ ဦးဆောင်မှုနဲ့ Samsung က QD-OLED၊ MicroLED နဲ့ Neo QLED လို နည်းပညာအသစ်တွေကို အောင်အောင်မြင်မြင် မိတ်ဆက်နိုင်ခဲ့ပါတယ်။

Samsung Electronics ရဲ့ နောက်ထပ် ပူးတွဲအမှုဆောင်အရာရှိချုပ်တစ်ဦးဖြစ်သူ ကယ်ယွန်းဟယွန်း (Kyehyun Kyung) နဲ့ ဥက္ကဋ္ဌ လီဂျေးယောင်း (Lee Jae-yong) တို့ကတော့ ဟန်ဂျုံးဟီရဲ့ ကွယ်လွန်မှုကို "Samsung မိသားစုအတွက် ဘယ်လိုမှ ဖြည့်ဆည်းလို့မရတဲ့ ဆုံးရှုံးမှု" လို့ ပြောပါတယ်။ ကုမ္ပဏီအနေနဲ့ သူ့ရဲ့ အတွေးအခေါ်နဲ့ စီမံခန့်ခွဲမှုပုံစံတွေကို ဆက်ပြီး ကျင့်သုံးသွားမယ်လို့လည်း ကတိပေးထားပါတယ်။

ဟန်ဂျုံးဟီရဲ့ နေရာကို ဘယ်သူ့ကို ဆက်ခံစေမလဲဆိုတာကိုတော့ Samsung က နောက်ပိုင်းမှသာ ထုတ်ပြန်သွားမယ်လို့ ဆိုပါတယ်။ သူ့ရဲ့ ဈာပနကိုတော့ မိသားစုနဲ့ နီးစပ်တဲ့ လုပ်ဖော်ကိုင်ဖက်တွေပဲ တက်ရောက်ကြမှာပါ။

ဟန်ဂျုံးဟီရဲ့ ကွယ်လွန်မှုက Samsung အတွက်တင်မက နည်းပညာလောကတစ်ခုလုံးအတွက်ပါ ကြီးမားတဲ့ ဆုံးရှုံးမှုတစ်ခုပါ။ သူ့ရဲ့ လက်ရာတွေနဲ့ လွှမ်းမိုးမှုတွေကို နောင်နှစ်ပေါင်းများစွာ ခံစားရဦးမှာဖြစ်ပါတယ်။

Source: Reuters