United Airlines ၏ ပျံသန်းမှုခရီးစဥ်အားလုံးတွင် Starlink Internet ကို အခမဲ့ပေးအပ်လာမည်

Image via TechSpot

အမေရိကန်ပြည်ထောင်စုက အထင်ကရလေကြောင်းလိုင်းတစ်ခုဖြစ်တဲ့ United Airlines ဟာ သူ့တို့ရဲ့လေယာဉ်တွေအားလုံးမှာ Starlink ရဲ့ ဂြိုလ်တုအင်တာနက်ဝန်ဆောင်မှုကိုတပ်ဆင်သွားဖို့ရှိကြောင်း ကြေညာလိုက်ပါတယ်။ ဒီတပ်ဆင်မှုဟာ နှစ်အနည်းကြာမြင့်ဖွယ်ရှိပြီး ပထမဆုံးစမ်းသပ်မှုကို ၂၀၂၅ခုနှစ်ဆန်းပိုင်းမှာ ပြုလုပ်သွားဖွယ်ရှိပါတယ်။ အစီစဉ်အတိုင်းသာဖြစ်လာခဲ့မယ်ဆိုရင် Starlink ဝန်ဆောင်မှုရရှိတဲ့ United Airlines ရဲ့ ပထမဆုံးခရီးစဥ်ကို နောက်နှစ်လောက်မှာ စတင်ပြေးဆွဲလာမှာပါ။ United လေကြောင်းလိုင်းကတော့ လေယာဉ် ၁,၀၀၀ ကျော်မှာ Starlink စနစ်တွေ တပ်ဆင်ဖို့ စီစဉ်ထားပြီး ဒီအတိုင်းအတာအလိုက် Starlink ဝန်ဆောင်မှုကို ပံ့ပိုးပေးမယ့် အကြီးဆုံး လေကြောင်းလိုင်းဖြစ်လာမှာပါ။

လေကြောင်းလိုင်းဘက်က အမြန်နှုန်းအတိအကျကိုတော့ ထုတ်ဖော်ထားခြင်းမရှိပေမယ့် လေယာဉ်ထိုင်ခုံနောက်မှာ တပ်ဆင်ထားတဲ့မျက်နှာပြင်ပေါ်မှာပဲဖြစ်ဖြစ်၊ ကိုယ့်ရဲ့စမတ်ဖုန်းတွေနဲ့ဖြစ်ဖြစ် Live TV ကြည့်တာ၊ စီးရီးနဲ့ရုပ်ရှင်တွေ ကြည့်တာ၊ ဂိမ်းဆော့တာ၊ လူမှုကွန်ရက်အသုံးပြုတာ၊ အွန်လိုင်းစျေးဝယ်တာ အစရှိတဲ့ မည်သည့်အင်တာနက်သုံးစွဲမှုကိုမဆို အသုံးပြုနိုင်အောင် စီစဉ်ပေးမှာဖြစ်ပါတယ်။

Starlink Aviation ရဲ့ ထောက်ပံ့ရေးမှတ်တမ်းတွေအရ ဒီဝန်ဆောင်မှုဟာ ဒေါင်းလုပ်အမြန်နှုန်း 40 Mbps ကနေ 220 Mbps အထိ ရနိုင်ပြီး ခရီးသည်တွေအားလုံးဟာ တစ်ပြိုင်တည်း ဗီဒီယိုတွေကို သက်တောင့်သက်သာနဲ့ ကြည့်ရှုနိုင်တဲ့ အမြန်နှုန်းရရှိမှာ ဖြစ်ပါတယ်။

220 Mbps ဆိုတာ အိမ်တွေမှာလက်ရှိ 1 Gbps လောက်ရနေတဲ့ အချို့မြေပြင်အခြေစိုက် အင်တာနက်ဝန်ဆောင်မှုတွေရဲ့ မြန်နှုန်းနဲ့နှိုင်းယှဥ်မယ်ဆိုရင် မပြောပလောက်တဲ့ ပမာဏလို့ဆိုနိုင်ပေမယ့် လေယာဉ်ပေါ်မှာတော့ လွန်စွာမြန်ဆန်တဲ့ အတွေ့အကြုံပဲ ဖြစ်ပါတယ်။ The Wall Street Journal က Joanna Stern ရဲ့ အဆိုအရ အချို့လေကြောင်းခရီးစဉ်တွေဟာ ခေတ်ဟောင်း 3G ကွန်ရက်ကို ဆက်လက်အသုံးပြုနေတုန်းပဲလို့ဆိုပါတယ်။ ဒီအမြန်နှုန်းက အီးမေးလ်ပို့တာ၊ စာရေးတာတွေအတွက် လုံလောက်တယ်ဆိုပေမယ့် အခြားလုပ်ဆောင်မှုတွေအတွက် မလုံလောက်တော့ပါဘူး။

SpaceX ရဲ့ Starlink လို အင်တာနက်ဝန်ဆောင်မှုတွေကတော့ မြန်ဆန်စွာပျံသန်းနေတဲ့ လေယာဥ်တွေကိုတိုက်ရိုက်ထုတ်လွင့်ပေးနိုင်တဲ့ ပတ်လမ်းနိမ့်ဂြိုလ်တုကို မှီခိုပြီး အမြန်ဆုံးကြိုးမဲ့ကွန်ရက်ကိုပေးအပ်နေတာဖြစ်ပါတယ်။ Starlink တပ်ဆင်ထားတဲ့ JSX လေယာဉ်ခရီးစဥ်တစ်ခုမှာ Sternရဲ့ လတ်တလောစမ်းသပ်ချက်အရ ဒေါင်းလုပ်အမြန်နှုန်း 150 Mbps နဲ့ အထင်ကြီးလောက်စရာ latency ကို ရရှိခဲ့တယ်လို့ဆိုပါတယ်။

လောလောဆယ်တော့ Starlink ဝန်ဆောင်မှုကို Hawaiian Air နဲ့ JSX ဆိုတဲ့ လေကြောင်းလိုင်း ၂ခုကသာ အသုံးပြုနေပြီး United လေကြောင်းလိုင်းရဲ့အသုံးပြုမှုက ဒီဝန်ဆောင်မှုကို ပိုမိုကျယ်ပြန့်လာစေမှာဖြစ်ပြီး လေကြောင်းလိုင်းတွေအနေနဲ့ သူတို့ရဲ့အင်တာနက်ဝန်ဆောင်မှုတွေကို အပြိုင်အဆိုင်တိုးတက်အောင်လုပ်ဆောင်ရတော့မယ့် အခြေအနေကို ရောက်ရှိလာတော့မှာပါ။

Source: TechSpot