AMD က RDNA4 architecture၊ Radeon RX 9070 GPU များ၊ FSR 4 နှင့် Ryzen 9000 X3D CPU များကို ထုတ်ဖော်ပြသ

CES 2025 ရဲ့ အံ့အားသင့်စရာအကောင်းဆုံးက AMD က ပြပွဲမှာ RDNA4 GPU အသစ်တွေကို အပြည့်အဝ မမိတ်ဆက်သေးဘဲ RDNA4 architecture အသစ်နဲ့ graphics card မော်ဒယ် နှစ်ခုကို "preview" အနေနဲ့သာ ပြသဖို့ ဆုံးဖြတ်ခဲ့တာပါပဲ။ ရေးသားနေချိန်အထိ AMD က RDNA4 architecture ၊ Radeon RX 9070 စီးရီး GPU တွေ၊ Machine Learning အသုံးပြုလာတဲ့ FSR 4 upscaling နဲ့ Ryzen 9000 X3D desktop CPU အသစ်တွေကို တရားဝင် ကြေညာခဲ့ပါတယ်။

AMD က Radeon RX 9070 XT နဲ့ Radeon RX 9070 ဂရပ်ဖစ်ကဒ်အသစ်တွေကို ကြေညာခဲ့ပေမဲ့ "၂၀၂၅ ပထမသုံးလပတ်" လို့ အတိအကျ မဟုတ်တဲ့ ထုတ်ပြန်ရက်ကလွဲပြီး အခြားအချက်အလက်တွေကို မဖော်ပြခဲ့ပါဘူး။ ဒါက လူအများစုက AMD ရဲ့ RDNA4 အကြောင်းအသေးစိတ် အပြည့်အစုံကို မျှော်လင့်ထားတာကြောင့် တော်တော်လေးစိတ်ပျက်စရာကောင်းပါတယ်။ ဒါကြောင့် ဒီမော်ဒယ်တွေအကြောင်း အသေးစိတ်သိရှိနိုင်ဖို့ ထပ်မံစောင့်ဆိုင်းရမှာဖြစ်ပါတယ်။

ဒီလိုဖြစ်ရတာကလည်း AMD အနေနဲ့ Nvidia ရဲ့ GeForce 50 စီးရီး ကြေညာချက်မတိုင်ခင် အသေးစိတ်အချက်အလက်တွေကို မျှဝေဖို့ ဆန္ဒမရှိလိုပုံပေါ်ပါတယ်။ ဒါက AMD ကို Nvidia ရဲ့ မျိုးဆက်သစ် GPU တွေ လွတ်လပ်စွာတုံ့ပြန်မယ့်အခွင့်အရေးရမှာဖြစ်ပါတယ်။ ပိုပြီး အပြုသဘောဆောင်တဲ့ ရှုထောင့်ကနေ ကြည့်မယ်ဆိုရင် AMD က Nvidia ဘာလုပ်မလဲဆိုတာကို စောင့်ကြည့်နေတာဖြစ်နိုင်ပြီး သူတို့ရဲ့ ထုတ်ကုန်တွေက အပြိုင်အဆိုင် အလွန်မြင့်မားကြောင်း သေချာစေဖို့နဲ့ Nvidia နဲ့ နှိုင်းယှဉ်ပြီး သူတို့ရဲ့ ကဒ်တွေကို ပိုကောင်းအောင် စျေးကွက်တင်ဆက်ဖို့ ဖြစ်နိုင်ပါတယ်။ ဒီမျိုးဆက်မှာ Nvidia က ကျွန်တော်တို့ကို သင့်တင့်တဲ့ ဈေးနှုန်းနဲ့ စွမ်းဆောင်ရည် တိုးတက်မှု ပေးဖို့ ဆုံးဖြတ်ရင် AMD က နောက်ပိုင်းမှာ ပိုပြီး ပြင်းထန်တဲ့ ဈေးနှုန်းနဲ့ တုံ့ပြန်နိုင်တယ် သို့မဟုတ် configuration အနည်းငယ် ချိန်ညှိမှုတွေ ပြုလုပ်နိုင်ပါတယ်။ တကယ်တမ်းမှာ AMD အတွက် အရေးကြီးဆုံးအချက်က RDNA4 က Nvidia ရဲ့ ထုတ်ကုန်အသစ်တွေနဲ့ နှိုင်းယှဉ်ရင် ဘယ်လောက်ကောင်းလဲဆိုတာပါပဲ။

Radeon RX 9070 GPU အသစ်များ

AMD က Radeon RX 9070 XT နဲ့ RX 9070 ကို ကြေညာခဲ့ပြီး Asus၊ Gigabyte၊ Sapphire နဲ့ PowerColor တို့လိုမျိုး ပုံမှန်ထုတ်ပေးနေကြ brand တွေအပြင် မိတ်ဖက်အမျိုးမျိုးတွေထံက ၂၀၂၅ ပထမသုံးလပတ်မှာ ဝယ်ယူနိုင်မှာပါ။ MSI ကတော့ RDNA3 ကတည်းက AMD ကတ်တွေမထုတ်တော့တာကြောင့် RDNA4 ကတ်တွေကိုလည်း ထုတ်လုပ်တော့မှာ မဟုတ်ပါဘူး၊ ဘာကြောင့်လဲဆိုတဲ့ တရားဝင် အကြောင်းပြချက်ကိုလည်း မပေးခဲ့ပါဘူး။ TechSpot ကတော့ AMD နဲ့ MSI ကြားမှာ တစ်မျိုးမျိုး ဆက်ဆံရေး ပြဿနာ ရှိနေပုံရလို့ယူဆထားပါတယ်။

ဒီသတင်းရဲ့ အပေါ်ဆုံးပုံမှာ မိတ်ဖက် မော်ဒယ်အမျိုးမျိုးကို တွေ့နိုင်ပေမဲ့ AMD က ပန်ကာ သုံးခုနဲ့ နှစ်ခု ဒီဇိုင်းနှစ်မျိုးလုံးမှာ reference model ကတ်အသစ်တစ်ခုကို ပုံထဲမှာ တိတ်တဆိတ် ထည့်ထားပုံရပါတယ်။ ဒီ reference model ဒီဇိုင်းကို လွန်ခဲ့တဲ့ ရက်သတ္တပတ် အနည်းငယ်က AMD ကြော်ငြာတစ်ခုမှာ ဖော်ပြခဲ့ဖူးပါတယ်။

RDNA4 architecture နဲ့ ပတ်သက်လို့ AMD က CES မှာ အနည်းငယ်သာ ထုတ်ဖော်ပြောကြားခဲ့ပါတယ်။ RDNA4 ကို RDNA3 နဲ့ တူညီတဲ့ TSMC node မိသားစုပေါ်မှာ တည်ဆောက်မှာဖြစ်ပါတယ် - ဒီနေရာမှာ RDNA4 အတွက် 4nm node ဖြစ်ပြီး RDNA3 အတွက် compute die ကိုတော့ N5 ပေါ်မှာ တည်ဆောက်ခဲ့တာဖြစ်ပါတယ်။ RDNA4 က RDNA3 နဲ့ မတူညီတဲ့ ဒီဇိုင်းကို သုံးမယ်လို့ မျှော်လင့်ရပြီး GPU core တွေနဲ့ memory controller ကို သီးခြား node တွေပေါ်မှာ သီးခြား dies တွေအဖြစ် ခွဲခြားမထားတော့ပါဘူး၊ ဒါပေမဲ့ ဒါက ဘယ်လိုပုံစံလဲဆိုတာကို အတိအကျ အတည်ပြုထားတာ မရှိသေးပါဘူး။

AMD က RDNA4 နဲ့အတူ architecture ပိုင်းဆိုင်ရာ တိုးတက်မှု အများအပြားရှိတယ်လို့ ဆိုပါတယ်။ အဓိက featureက ပိုမိုကောင်းမွန်အောင်ဖန်တီးထားတဲ့ compute unit ဖြစ်ပြီး AMD က architecture ပိုင်းမှာ "သိသိသာသာ" ပြောင်းလဲလာတာ၊ IPC မြင့်မားလာနဲ့ frequency တိုးတက်လာတွေ ပါဝင်တယ်လို့ ပြောခဲ့ပါတယ် - ဒါက သာမန် optimization ထက် အနည်းငယ်ပိုသာလွန်ပုံရပါတယ်။ ဒါက RDNA4 က RDNA3 နဲ့ တူညီတဲ့ compute unit အရေအတွက်ကနေ သိသာတဲ့ စွမ်းဆောင်ရည် တိုးတက်မှုကို မြင်တွေ့ရမယ်လို့ ညွှန်ပြနေပါတယ်။ RDNA3 မော်ဒယ်တွေရဲ့ clock speed ဟာ ပုံမှန်အားဖြင့် 2.1 နဲ့ 2.3 GHz ကြားရှိတာကြောင့် ပိုကောင်းတဲ့ IPC နဲ့ ပေါင်းစပ်ပြီး clock speed မြှင့်တင်လိုက်ခြင်းက သင့်တင့်တဲ့ စွမ်းဆောင်ရည် တိုးတက်မှုကို ဖြစ်ပေါ်စေသင့်ပါတယ်။

ဒါ့အပြင် AMD က RDNA4 ရဲ့ AI အပိုင်းမှာ architecture ပိုင်းဆိုင်ရာ "ကြီးမားတဲ့" ပြောင်းလဲမှု ပါဝင်လာတယ်လို့ဆိုထားပြီး အတိအကျ ပြောကြားခဲ့တာတော့မရှိပါဘူး။ ray tracing engine ကို စွမ်းဆောင်ရည် ပိုကောင်းအောင် ပြန်လည်ပြင်ဆင်ထားပေမဲ့ ဒါကို ကိန်းဂဏန်းတွေ မရှိသေးပါဘူး။ ဒါတင်မက display ချိတ်ဆက်မှုမှာ နောက်ထပ် တိုးတက်မှုလို့ဆိုနိုင်တဲ့ ဒုတိယမျိုးဆက် "Radiance Display Engine" လည်း ပါဝင်တယ်လို့ဆိုပါတယ်။

AMD ရဲ့ အဆိုအရ media encoder က သိသိသာသာပိုကောင်းလာတယ်လို့ဆိုပြီး ဒီပြောဆိုချက်ကို အထောက်အပံ့ပေးမယ့် အသေးစိတ်အချက်အလက်အချို့ကို မျှဝေခဲ့ပါတယ်။ မှတ်စုတစ်ခုမှာ ဒါက 1080p နဲ့ 4K မှာ ဂိမ်းသုံးခု (Borderlands 3, Far Cry 6 နဲ့ Watch Dogs Legion) မှာ RDNA3 နဲ့ RDNA4 အကြား VMAF အရည်အသွေး ရမှတ်တွေကို အသုံးပြုပြီး H.264 ရုပ်ထွက်အရည်အသွေးကို နှိုင်းယှဉ်နေကြောင်း ဖော်ပြထားပါတယ်။ H.264 က AMD ရဲ့ media encoder အတွက် အလွန် အားနည်းတဲ့ အချက်တစ်ခုဖြစ်တာကြောင့် H.264 ကို ကျယ်ကျယ်ပြန့်ပြန့် အသုံးပြုနေဆဲဖြစ်တာကို ထည့်တွက်ရင် အဲဒီဧရိယာမှာ တိုးတက်မှုကို ပစ်မှတ်ထားတဲ့ ဒီပြောဆိုချက်တွေကို မြင်တွေ့ရတာက အားတက်စရာဖြစ်ပါတယ်။ RDNA3 ရဲ့ ပြဿနာတစ်ခုဖြစ်တဲ့ AV1 output နဲ့ 1080p ထုတ်ပေးရမယ့်အစား 1082p ဖြစ်တာမျိုးတွေ အခုမှာ encoder မှာ မရှိဘူးလို့ မျှော်လင့်ရပါတယ်။

AMD က RDNA4 အတွက် တိကျတဲ့ စွမ်းဆောင်ရည် အချက်အလက်တွေကို မပေးသေးပါဘူး၊ ဒါပေမဲ့ Radeon အမှတ်တံဆိပ်အကြောင်း ပြောနေတဲ့ ဒီ slide မှာ နမူနာတစ်ခုကို မျှဝေခဲ့ပါတယ်။ အနက်ရောင် မီးခိုးရောင်မှာ GeForce 40 စီးရီးနဲ့ RX 7000 စီးရီးလိုမျိုး လက်ရှိ မျိုးဆက်တွေ ရှိပြီး AMD က RTX 5000 စီးရီးက လက်ရှိ မော်ဒယ်တွေထက် နည်းနည်းပိုမြန်တဲ့ နေရာကို ရောက်ရှိမယ်လို့ ယုံကြည်တဲ့ မျဉ်းကြောင်းတစ်ခု ရှိပါတယ်။ ညာဘက်မှာတော့ RX 9070 နဲ့ RX 9060 စီးရီး နှစ်ခုလုံးအတွက် နေရာချထားမှု နောက်ထပ် သတင်းအချက်အလက် မပါဘဲ 9060 အကြောင်းကိုလည်း ဖော်ပြထားပါတယ်။

AMD က အနိမ့်စား RX 9070 မော်ဒယ်က RX 7800 XT အဆင့် စွမ်းဆောင်ရည် ရှိနိုင်တယ်လို့ ညွှန်ပြနေပြီး အဲနောက်မှာ 7700 XT နဲ့ 7800 XT ကြား စွမ်းဆောင်ရည်ကို ပေးစွမ်းတဲ့ RX 9060 စီးရီးကို မြင်တွေ့ရမှာဖြစ်ပါတယ်။

AMD ဘက်က RX 9000 Series လို့အမည်ပေးရခြင်းဟာ အကြောင်းပြချက် နှစ်ခုကြောင့် လို့ ဆိုပါတယ်။ ပထမတစ်ခုက သူတို့ရဲ့ တိုက်ရိုက် ပြိုင်ဘက်နဲ့ ကိုက်ညီစေဖို့ဖြစ်ပြီး AMD ကဒ်တွေကို ဘယ်လို နှိုင်းယှဉ်ရမလဲဆိုတာကို လူတွေအတွက် ပိုမိုလွယ်ကူစေဖို့ Nvidia ကို အခြေခံအားဖြင့် တုပထားခြင်းဖြစ်ပါတယ်။ အခြေခံအားဖြင့် သူတို့က RX 9070 စီးရီးက RTX 5070 စီးရီးရဲ့ ပြိုင်ဘက်ဖြစ်တယ်လို့ ပြောနေတာဖြစ်ပြီး အဲဒါက စွမ်းဆောင်ရည်နဲ့ ဈေးနှုန်း နှစ်ခုလုံးအတွက် ဆိုလိုတာလားဆိုတာကိုတော့ စောင့်ကြည့်ရဦးမှာပါ။ ဒုတိယတစ်ခုက သူတို့ရဲ့ CPU စီးရီးနဲ့ ကိုက်ညီစေဖို့နဲ့ 8000 စီးရီး GPU အမှတ်အသားကို RDNA3.5 နဲ့ မိုဘိုင်း ဒီဇိုင်းတွေအတွက် အသုံးပြုနေတာကြောင့် 8000 အစား 9000 ဆိုတဲ့ အမည်ကို ရွေးချယ်ခဲ့တယ်လို့ ဆိုပါတယ်။

ရိုးရိုးသားသားပြောရရင် နာမည်က တကယ်တမ်းမှာ သိပ်အရေးမကြီးပါဘူး။ အရေးကြီးတာက AMD က ပြိုင်ဆိုင်နိုင်စွမ်းရှိတဲ့ စွမ်းဆောင်ရည်တွေနဲ့ စျေးသင့်တင့်တဲ့ GPU ကို ပေးစွမ်းနိုင်မလားဆိုတာပါပဲ။ သူတို့ရဲ့ ထုတ်ကုန်လိုင်းကို ပြန်လည်အမည်ပြောင်းတာက Nvidia ကဒ်နဲ့ ပိုတူအောင် လုပ်တာက ရောင်းအား ပိုများလာဖို့ အဓိကအချက် မဟုတ်ပါဘူး။ အဓိကအချက်က RTX 5070 က ဘယ်လိုကတ်ပဲဖြစ်နေပါစေ ပိုတန်တဲ့ စျေးနှုန်းကိုပေးအပ်နိုင်ဖို့ဖြစ်ပါတယ်။

FSR 4 = Machine-learning-based upscaling

AMD က RDNA4 GPU တွေနဲ့အတူ ပါဝင်လာမယ့် feature အသစ် နှစ်ခုကိုလည်း ကြေညာခဲ့ပါတယ်။ ပထမတစ်ခုက "Adrenalin AI" ဖြစ်ပြီး နောက်တစ်ခုက ဂိမ်းကစားသူတွေအတွက် ပိုအရေးကြီးတဲ့ feature ဖြစ်တဲ့ FSR 4 ပါ။ အခုဆိုရင် FSR 4 က နောက်ဆုံးမှာ machine-learning ကိုအခြေခံတဲ့ upscaling ဖြစ်သွားပါပြီ။ FSR 4 အကြောင်းအသေးစိတ်ပြောထားတာမရှိပဲ RDNA4 အတွက် တီထွင်ထားပြီး အရည်အသွေးမြင့် 4K upscaling အတွက် ဒီဇိုင်းထုတ်ထားလို့သာသိရပါတယ်။

FSR 4 ရဲ့ အရည်အသွေးက DLSS နဲ့ တန်းတူယှဉ်နိုင်အောင် တိုးတက်လာမယ်ဆိုတဲ့ အလားအလာရှိပါတယ်။ Nvidia က အသုံးပြုနှင့်ပြီး XeSS မှာ Intel အသုံးပြုလာတဲ့ AI-အခြေခံ algorithm နဲ့ဆိုရင် ဖြစ်နိုင်မယ်လို့ မျှော်လင့်ရပါတယ်။ ဒါပေမဲ့ FSR 4 ရဲ့ သရုပ်ပြမှုမတွေ့ရသေးသလို ဘယ်အချိန်မှာ ထွက်ရှိမလဲဆိုတာကိုလည်း မသိရသေးပါဘူး။

နောက်ထပ် စိတ်ဝင်စားစရာအချက်အလက်က FSR 4 ကို RDNA4 မှာ တည်ဆောက်ထားတဲ့ AI accelerators တွေကို အသုံးပြုဖို့ ဒီဇိုင်းထုတ်ထားပေမဲ့ FSR 4 ဟာ RDNA4 ကဒ်တွေမှာပဲ သုံးလို့ရမယ့် သီးသန့်နည်းပညာတစ်ခုလား၊ ဒါမှမဟုတ် အရင်မျိုးဆက် AMD ကဒ်တွေအပြင် Nvidia နဲ့ Intel ကဒ်တွေမှာပါ သုံးလို့ရတဲ့ FSR 3 လိုမျိုး ကျယ်ကျယ်ပြန့်ပြန့် သုံးလို့ရမယ့် နည်းပညာတစ်ခုလားဆိုတာကို AMD က ရှင်းရှင်းလင်းလင်း မပြောသေးပါဘူး။

ကျွန်တော်တို့က စိတ်ဝင်စားစရာကောင်းတဲ့ မှတ်စုတစ်ခုကိုလည်း သတိထားမိလိုက်ပါတယ်။ မှတ်စုမှာရေးထားတာက ဂိမ်းတစ်ခုမှာ FSR 3.1 ပါပြီးသားဆိုရင် RX 9070 ကဒ်ကို သုံးတဲ့အခါ အဲဒီဂိမ်းက FSR 4 ကို အလိုအလျောက် ပြောင်းသုံးသွားမယ်လို့ ဆိုလိုပါတယ်။ AMD က FSR 3.1 ကို FSR 4 အဖြစ် ပြောင်းပေးနိုင်တဲ့ နည်းပညာတစ်ခုကို တီထွင်ထားပုံရပါတယ်။

slide မှာ အဓိကအချက်တွေနဲ့ မသက်ဆိုင်ပုံရတဲ့ ဒီထူးဆန်းတဲ့ မှတ်စုအကြောင်းကို AMD ကို မေးမြန်းခဲ့ပြီး သူတို့က အသေးစိတ် ရှင်းပြဖို့ ငြင်းဆိုခဲ့ပါတယ်၊ ဒါက နည်းနည်း ထူးဆန်းပါတယ်။ ဒီ feature က မှတ်စုကအတိုင်း တကယ် ရှိနေရင် FSR 3.1 က ဂိမ်း ၅၀ ဝန်းကျင်မှာ ရရှိနိုင်တာကို ထည့်တွက်ရင် ဒါက FSR 4 ကို စတင်ဖို့ အလွန် ခိုင်မာတဲ့ နည်းလမ်းတစ်ခု ဖြစ်ပါလိမ့်မယ်။ 

အကယ်၍ AMD ရဲ့ ပြောဆိုချက်အတိုင်း FSR 3.1 ပါပြီးသား ဂိမ်းတွေကို RX 9070 ကဒ်နဲ့ အသုံးပြုချိန်မှာ FSR 4 ကို အလိုအလျောက် အဆင့်မြှင့်တင်ပေးနိုင်မယ်ဆိုရင် ဂိမ်းအများအပြားမှာ FSR 4 ကို ချက်ချင်း အသုံးပြုနိုင်မှာဖြစ်လို့ FSR 4 စတင်ခြင်းအတွက် အင်မတန် အထောက်အကူဖြစ်စေမှာပါ။ ဒါပေမဲ့ AMD က ဒီအချက်ကို အတိအကျ ရှင်းမပြခဲ့ပါဘူး။

မိတ်ဖက် အမျိုးမျိုးက CES 2025 မှာ Radeon RX 9070 မော်ဒယ်တွေကို ပြသမှာဖြစ်တာကြောင့် လာမယ့် ရက်အနည်းငယ်အတွင်း Las Vegas မှာပဲ သူတို့နဲ့ လက်တွေ့ အချိန်အနည်းငယ် ရရှိမယ်လို့ မျှော်လင့်ပါတယ်။

Ryzen 9 9950X3D နဲ့ Ryzen 9 9900X3D CPU အသစ်များ

AMD က နောက်ထပ် desktop Ryzen 9000 CPU နှစ်ခုကိုလည်း ကြေညာခဲ့ပြီး Ryzen 9 9950X3D နဲ့ Ryzen 9 9900X3D တို့ဖြစ်ပါတယ်။ ဒါတွေက မျှော်လင့်ထားတဲ့အတိုင်းပဲ ဒုတိယမျိုးဆက် 3D V-Cache နည်းပညာကို 16-core နဲ့ 12-core CPU တွေဆီ ယူဆောင်လာပြီး CPU တစ်ခုတည်းကနေ ဂိမ်းကစားသူတွေရော အကြောင်းအရာဖန်တီးသူတွေအတွက်ပါ ကောင်းမွန်တဲ့ စွမ်းဆောင်ရည်ကို ပေးစွမ်းမှာဖြစ်ပါတယ်။

16-core ပါဝင်တဲ့ Ryzen 9 9950X3D မှာ L3 cache စုစုပေါင်း 128MB ပါဝင်ပြီး မူရင်း Zen 5 CCD တွေက 64MB နဲ့ CCD တစ်ခုရဲ့ အောက်မှာ ထပ်ဆင့်ထားတဲ့ 64MB ပါဝင်ပါတယ် - ကျန်တဲ့ CCD က V-cache မပါဝင်ပဲ 7950X3D လိုဒီဇိုင်းဖြစ်ပါတယ်။ ဂိမ်းတွေက V-cache ပါတဲ့ 8-core CCD မှာ သေသေချာချာချာ run ဖို့အတွက် scheduling က လိုအပ်နေဆဲဖြစ်ပြီး ကျန်တဲ့ CCD က ဖြစ်နိုင်သမျှ အမြင့်ဆုံး frequency တွေမှာ run ဖို့ ဒီဇိုင်းထုတ်ထားပါတယ် - ဒီအခြေအနေမှာ 5.7 GHz ရှိမှာဖြစ်ပြီး 7950X3D နဲ့ တူညီတဲ့ အမြင့်ဆုံး clock speed ဖြစ်ပါတယ်။

TDP ကလည်း 7950X3D နဲ့ တူညီတဲ့ 170W ဖြစ်တာကြောင့် ဒါက အခြေခံအားဖြင့် Zen 4 ကနေ Zen 5 core architecture ကို တိုက်ရိုက် အဆင့်မြှင့်တင်မှု ဖြစ်ပါတယ်။

12-core မော်ဒယ်ဖြစ်တဲ့ 9900X3D ကလည်းမျှော်လင့်ထားသလို L3 cache 128MB နဲ့ 7900X3D ထက် 100 MHz နိမ့်တဲ့ 5.5 GHz boost frequency အမြင့်ဆုံး ရရှိနိုင်ပါတယ်။ TDP ကလည်း 120W မို့ အတူတူပါပဲ။ AMD က ဒီ CPU နှစ်ခုလုံးအတွက် ဈေးနှုန်းမကြေညာသေးဘဲ  ၂၀၂၅ ပထမသုံးလပတ်မှာ ရရှိနိုင်မယ်လို့သာ ပြောထားပါတယ်။

စွမ်းဆောင်ရည်နဲ့ ပတ်သက်လို့ AMD က သူတို့ရဲ့ စမ်းသပ်မှုတွေမှာ 9950X3D က  9800X3D နဲ့ အကြမ်းဖျင်း တူညီတဲ့ ဂိမ်းစွမ်းဆောင်ရည်ကို ပေးစွမ်းမယ်လို့ ဆိုပြီး ၁% သာကွာခြားမယ်လို့ဆိုပါတယ်။ ဆိုလိုတာက AMD ရဲ့ 1080p high settings နဲ့ ဂိမ်း ၄၀ ကို စမ်းသပ်မှုမှာ 7950X3D နဲ့ နှိုင်းယှဉ်ရင် ၈% တိုးတက်မှု ရှိတယ်လို့ ဆိုလိုတာပါ။ AMD က ထပ်ပြောတာက အဲဒီ ၈% တိုးတက်မှုဟာ 9800X3D နဲ့ 7800X3D တို့ရဲ့ စွမ်းဆောင်ရည် ကွာခြားမှုနဲ့ ဆင်တူပါတယ်တဲ့။

နောက်ပြီး Intel ရဲ့ Core i9 285K နဲ့ နှိုင်းယှဉ်ရင်တော့ 9950X3D က ဂိမ်းတွေမှာ ၂၀% ပိုမြန်မယ်လို့ AMD က ယုံကြည်ပါတယ်။

Productivity apps တွေနဲ့ creator workload တွေမှာ AMD က 7950X3D နဲ့ နှိုင်းယှဉ်ရင် app ၂၀ မှာ ၁၃% စွမ်းဆောင်ရည် တိုးတက်လာမယ်လို့ ဖော်ပြထားပြီး Core Ultra 9 285K နဲ့ နှိုင်းယှဉ်ရင် ၁၀% တိုးတက်လာမယ်လို့ ဆိုပါတယ်။ ဒါကြောင့် AMD က သူတို့ရဲ့ စမ်းသပ်မှုမှာ 285K ထက် ဂိမ်းကစားခြင်းနဲ့ productivity စွမ်းဆောင်ရည် နှစ်ခုလုံး ပိုကောင်းတာကြောင့် 9950X3D ဟာ ဂိမ်းကစားသူတွေနဲ့ ဖန်တီးသူတွေအတွက် အကောင်းဆုံး အစိတ်အပိုင်း ဖြစ်မယ်လို့ ယုံကြည်ပါတယ်။ ဟုတ်ပါတယ်၊ အဲဒါ တကယ် ဟုတ်မဟုတ်ဆိုတာကို အစိတ်အပိုင်းတွေ ထွက်ရှိချိန်မှာ review တွေကို ဆက်လက်ကြည့်ရှုဖို့လိုပါတယ်။

CES 2025 မှာ AMD ရဲ့ အခြားကြေညာချက်တွေကတော့ မိုဘိုင်း အစိတ်အပိုင်းတွေနဲ့ သက်ဆိုင်ပြီး မကြာခင်မှာ လက်တော့တွေနဲ့ လက်ကိုင်ဂိမ်းစက်တွေအတွက် hardware အသစ်နဲ့ ချစ်ပ်တွေကို ဖော်ပြသွားပါမယ်။ ခေတ်ကိုက AI ခေတ်မို့ AI အကြောင်းကိုလည်း အများအပြား ဖော်ပြထားပါတယ်။ AMD Ryzen AI Max+ Pro 395 လိုမျိုး နာမည်မှာ AI ပါတဲ့ လက်တော့ CPU တွေတောင် ရှိပါတယ်။

AMD က ဒီပွဲမှာ ထုတ်ကုန်အသစ်တွေရဲ့ အကြမ်းဖျင်း သဘောတရားလောက်ပဲ ပြောသွားတာဆိုပေမဲ့ ဒီထုတ်ကုန်အသစ်တွေအကြောင်း မကြာခင်မှာသိရတော့မှာပါ။ အထူးသဖြင့် RDNA4 အကြောင်းကို မကြာခင်မှာ ပိုပြီး အသေးစိတ် သိရမယ်လို့ မျှော်လင့်ရပါတယ်။

Source: TechSpot