Microsoft နှင့် OpenAI တို့က DeepSeek အနေဖြင့် ChatGPT ၏ အချက်အလက်များကို ရယူခဲ့ခြင်းရှိမရှိ စုံစမ်းစစ်ဆေးမှုပြုလုပ်နေ

Image: Mojahid Mottakin/Shutterstock

Bloomberg ရဲ့ သတင်းအရ Microsoft နဲ့ OpenAI တို့ဟာ DeepSeek လို့ခေါ်တဲ့ တရုတ် AI startup တစ်ခုနဲ့ ဆက်နွယ်နေတဲ့ အဖွဲ့တစ်ခုက ခွင့်ပြုချက်မရှိဘဲ OpenAI ရဲ့ API ကို သုံးပြီး OpenAI ရဲ့ ဒေတာတွေကို ရယူခဲ့သလားဆိုတာကို စုံစမ်းနေတယ်လို့ ဆိုပါတယ်။ OpenAI က သတင်းရင်းမြစ်တစ်ဦးကတော့ သူတို့မှာ အဲဒီအဖွဲ့က ဒေတာခိုးယူခဲ့တဲ့ သက်သေတွေ ရှိတယ်လို့ Financial Times ကို ပြောကြားထားတာ တွေ့ရပါတယ်။ အမေရိကန်အစိုးရအရာရှိတွေကတော့ DeepSeek က OpenAI ရဲ့ ထုတ်ကုန်တွေကို သုံးပြီး သူတို့ရဲ့ မော်ဒယ်ကို တည်ဆောက်ခဲ့တယ်လို့ သံသယရှိနေကြပါတယ်။ ဒီနည်းလမ်းကို distillation လို့ခေါ်ပါတယ်။

Microsoft ရဲ့ လုံခြုံရေးအဖွဲ့က DeepSeek နဲ့ ဆက်နွယ်တယ်လို့ ယူဆရတဲ့ အဖွဲ့တစ်ဖွဲ့ဟာ OpenAI ရဲ့ API ကနေ များပြားလှတဲ့ဒေတာတွေကို ထုတ်ယူနေတာကို တွေ့ရှိခဲ့ပါတယ်။ API က developer တွေကို ပိုက်ဆံပေးပြီး OpenAI ရဲ့ မူပိုင်မော်ဒယ်တွေကို သူတို့ရဲ့ application တွေမှာ ထည့်သွင်းခွင့်ပေးသလို ဒေတာအချို့ကိုလည်း ရယူခွင့်ပေးထားတာပါ။ ဒါပေမဲ့ Microsoft သုတေသီတွေ တွေ့ရှိခဲ့တဲ့ ဒေတာအများအပြားကို ရယူနေတာဟာ OpenAI ရဲ့ စည်းကမ်းသတ်မှတ်ချက်တွေကို ချိုးဖောက်ပြီး OpenAI ရဲ့ ကန့်သတ်ချက်တွေကို ကျော်လွှားဖို့ ကြိုးစားနေတာကို ပြသနေပါတယ်။

ဒီစုံစမ်းစစ်ဆေးမှုဟာ DeepSeek ရဲ့ R1 AI မော်ဒယ်ကို စတင်မိတ်ဆက်ပြီးနောက်မှာ ဖြစ်ပေါ်လာတာပါ။ ကုမ္ပဏီဘက်ကတော့ R1 ဟာ အကြောင်းပြချက်ပေးတာ၊ သင်္ချာနဲ့ အထွေထွေဗဟုသုတအစရှိတဲ့ နယ်ပယ်တွေမှာ အခြားထိပ်တန်း AI မော်ဒယ်တွေနဲ့ တန်းတူ ဒါမှမဟုတ် သာလွန်ကောင်းမွန်ပြီး အရင်းအမြစ်တွေကို ပိုမိုနည်းပါးစွာ အသုံးပြုတယ်လို့ ဆိုပါတယ်။ DeepSeek ရဲ့ ကြေညာချက်အပြီးမှာ Alphabet၊ Microsoft၊ Nvidia နဲ့ Oracle တို့ဟာ ဈေးကွက်ဆုံးရှုံးမှုစုစုပေါင်း ဒေါ်လာ ၁ ထရီလီယံနီးပါး ကြုံတွေ့ခဲ့ရပါတယ်။ DeepSeek ရဲ့ တိုးတက်မှုဟာ အမေရိကန်ကုမ္ပဏီတွေရဲ့ AI ကဏ္ဍမှာ လွှမ်းမိုးထားမှုကို ခြိမ်းခြောက်နိုင်တယ်ဆိုတဲ့ ရင်းနှီးမြှုပ်နှံသူတွေရဲ့ စိုးရိမ်မှုတွေ ပေါ်ထွက်လာခဲ့ပါတယ်။ ဒါပေမဲ့ DeepSeek က တခြားသူတွေဆီက တရားမဝင် ရရှိထားတဲ့ ဒေတာတွေကို အသုံးပြုခဲ့တယ်ဆိုရင် "ကုမ္ပဏီက ဒေါ်လာ ဘီလီယံပေါင်းများစွာ မရင်းနှီးမြှုပ်နှံဘဲ ရလဒ်တွေကို ဘယ်လိုရရှိခဲ့လဲ"ဆိုတဲ့ မေးခွန်းကို ဖြေရှင်းနိုင်မှာဖြစ်ပါတယ်။

အမေရိကန်အစိုးရရဲ့ AI အကြံပေးဖြစ်သူ David Sacks က DeepSeek ဟာ distillation လို့ခေါ်တဲ့ လုပ်ငန်းစဉ်တစ်ခုမှတစ်ဆင့် OpenAI မှ ထုတ်လုပ်ထားတဲ့ အကြောင်းအရာတွေကို အသုံးပြုပြီး ၎င်းရဲ့ မော်ဒယ်ကို လေ့ကျင့်ခဲ့တယ်ဆိုတဲ့ ခိုင်မာတဲ့ သက်သေအထောက်အထားတွေ ရှိတယ်လို့ ပြောကြားခဲ့ပါတယ်။ ဤနည်းလမ်းက AI စနစ်တစ်ခုကနေ အခြားAI စနစ်တစ်ခုကို ၎င်း၏ ရလဒ်တွေကို ခွဲခြမ်းစိတ်ဖြာခြင်းဖြင့် သင်ယူစေတဲ့ နည်းလမ်းတစ်ခု ဖြစ်ပါတယ်။ Sacks က သက်သေအထောက်အထားနဲ့ပတ်သက်ပြီး အသေးစိတ်အချက်အလက်တွေကိုတော့ မဖော်ပြခဲ့ပါဘူး။

OpenAI နဲ့ Microsoft တို့ကတော့ ဒီစုံစမ်းမှုနဲ့ ပတ်သက်ပြီး တရားဝင် ထုတ်ပြန်ပြောဆိုတာတွေ မရှိသေးပါဘူး။ DeepSeek နဲ့ ၎င်းကို တည်ထောင်ရာမှာ ကူညီပေးခဲ့တဲ့ High-Flyer hedge fund ကလည်း Bloomberg ရဲ့ မေးမြန်းချက်တွေကို မတုန့်ပြန်သေးပါဘူး။ ဒါပေမဲ့ Bloomberg နဲ့ Financial Times မှာ ဖော်ပြထားတဲ့ ထုတ်ပြန်ချက်တစ်ခုမှာတော့ OpenAI က တရုတ်ကုမ္ပဏီတွေဟာ အမေရိကန်ကုမ္ပဏီတွေရဲ့ မော်ဒယ်တွေကို ခိုးယူဖို့ကြိုးစားလေ့ရှိပြီး သူတို့ရဲ့ မော်ဒယ်တွေကို ကာကွယ်ဖို့ အတတ်နိုင်ဆုံး ကြိုးစားနေတယ်လို့ ဆိုပါတယ်။

DeepSeek ရဲ့ သုတေသနပြုချက်အရ သူတို့ရဲ့ R1 စနစ်ဟာ တခြား open-source စနစ်တွေကို အခြေခံပြီး မော်ဒယ်တွေကို "distilled" လုပ်ကာ တည်ဆောက်ထားတယ်လို့ ဆိုပါတယ်။ OpenAI ရဲ့ စနစ်တွေလို မဟုတ်ဘဲ Meta's Llama လို မော်ဒယ်တချို့က open-source ဖြစ်ပြီး လွတ်လပ်စွာ အခမဲ့အသုံးပြုနိုင်ပါတယ်။

Source: Tom's Hardware and Bloomberg